Почна новата фаза од разврската на политичката криза во Бугарија. Претседателот Румен Радев денеска попладнево му го врачи мандатот на Асен Василев, вицепремиер во оставка, да ја формира новата бугарска влада. Василев беше одреден за мандатар од неговата партија Продолжуваме со промената, а не лидерот Кирил Петков. Предавањето на мандатот, според видео инсертите, беше со смрзнати лица на учесниците.
„Бугарија е во политичка, економска и социјална криза. Бугарите споделуваат легитимна загриженост за растот на цените и неизвесноста околу иднината. Од вчера имаме и надворешнополитичка криза“, рече радев при давањето на мандатот.
На ова Асен василев одговори: „За мене ова е огромна одговорност. Сите сме свесни дека во кризите со кои треба да се соочи Бугарија, исклучително е важно да се има влада. Исто така, важно е тој да работи во интерес на граѓаните, а не во интересот на статус-квото, и таа навистина да ги брани бугарските интереси и независноста на бугарската држава на ист начин како што тоа го правеше првиот кабинет на Продолжуваме со промената“.
Партијата ќе има рок од седум дена да предложи владин состав. Доколку не биде одобрен, мандатот ќе оди кај ГЕРБ, кои веќе најавија дека ќе го вратат. После тоа, шефот на државата ќе треба да избере трета формација на која ќе ѝ даде шанса за формирање влада. Но, како што сега стојат работите, најверојатниот исход од оваа процедура ќе биде распишување на нови избори, четврти во година и пол.