Јелен до ЕУ- таквата одлука може да и наштети на глобалната економија

Apr 22, 2022

Американската министерка за финансии Џенет Јелен ја предупреди Европа да биде внимателна во однос на воведувањето целосно ембарго за увоз на руска енергија, бидејќи таквата одлука може да и наштети на глобалната економија и да го забави растот.

На прес-конференција на маргините на пролетниот состанок на ММФ и Светската банка во Вашингтон, Јелен рече дека итна забрана за увоз од ЕУ „несомнено ќе ги зголеми светските цени на нафтата“ и „ќе има штетен ефект врз Европа и другите делови на светот“, објави Фајненшл Тајмс (ФТ).

„На среден рок, Европа очигледно треба да ја намали зависноста од Русија за енергија, но мора да бидеме внимателни кога размислуваме за целосна европска забрана на увозот на нафта“, рече таа.

Таа додаде дека целосното ембарго можеби нема да има големо негативно влијание врз финансиите на Москва, бидејќи Русија е погодена од повисоките цени.

Наместо тоа, смета таа, фокусот на западните сојузници треба да биде на обидот да се намалат „приходите од продажбата на нафта и гас“ на Русија.

„Ако можеме да најдеме начин да го направиме тоа без да му наштетиме на целиот свет преку повисоките цени на енергијата, тоа би било идеално. И тоа е она што сите заедно се обидуваме да го решиме“, изјави Јелен.

Членките на ЕУ размислуваат за забрана за увоз на руска нафта поради, како што наведува ФТ, злосторства извршени од московските сили врз украинските цивили. Забраната за увоз на гас е политички и економски потешка одлука, но би можела да се најде на маса во подоцнежна фаза.

ПОСЛЕДНИ ВЕСТИ