Известувајќи за новозакажаните избори во Бугарија за 14 ноември, влијателниот портал „Политико.еу“ пишува дека Европската унија (ќе) ги следи со внимание заради можното влијание врз процесот на проширување, со акцент на Македонија.
„Бугарските избори се одблизу следени во Брисел поради нивниот потенцијален импакт врз дебатата за проширувањето. Од ноември минатата година Бугарија го блокира почетокот на преговорите за членство во ЕУ на својот сосед Северна Македонија поради споровите за историјата и за јазикот. На 6 октомври во Брдо, Словенија, ќе се одржи самит на лидерите на ЕУ за Западен Балкан, но дипломатите се скептични дека ќе се случи каква и да е промена во позицијата на Бугарија пред изборите“, пишува „Политико“.
„Апетитот за проширување во многу држави-членки, како Франција и Холандија, се намалува. Нацртот на декларацијата за самитот за Западен Балкан што циркулира деновиве и до кој дојде ‘Политико’ дури и не го вклучува зборот ‘проширување’. А на состанокот на амбасадорите на ЕУ во средата некои земји-членки побараа посветеноста на ЕУ кон регионот во декларацијата мора да биде јасно нагласена, според дипломат на ЕУ присутен на средбата“, се додава во написот.