По одржувањето на првата меѓувладина конференција во Брисел, претседателот на Демократската унија за интеграција г-дин Али Ахмети оствари денес средба со амбасадорот на Европската унија во земјата, г-дин Дејвид Гир, со кого поразговараа за големото значење на почетокот на процесот на преговори на нашата земја и стабилноста на регионот, како и за важноста на следните предизвици што ја очекуваат земјата по влегувањето во активната фаза на интегративниот процес.
Амбасадорот Гир му честиташе на претседателот на ДУИ за ова историско достигнување за земјата по 17 години чекање како земја кандидат и ја ценеше конструктивната улога на Демократската унија за интеграција за деблокирањето на европскиот пат на земјата.
Претседателот на ДУИ, Али Ахмети му се заблагодари на амбасадорот Гир за континуираната поддршка што Делегацијата на ЕУ во Скопје ја даваше на процесите за деблокирање на евроинтегративниот пат на земјата.
Г-дин Ахмети истакна дека ДУИ останува силно ангажирана во градењето на европската иднина на земјата врз основа на принципите на Охридскиот договор, Договорот од Преспа и договорот за добрососедство со Бугарија, процеси со кои земјата изгради мир, ги етаблираше принципите на еднаквост, се интегрираше во НАТО и ги реши споровите со соседите.
Ахмети го информираше амбасадорот Гир за напорите за уставни измени во земјата и ја истакна потребата од поддршка на проевропските сили од сите страни на политичкиот и општествениот спектар.
Ахмети и Гир го истакнаа големото значење што земјата треба да го придаде на успешното надминување на следните предизвици од кои ќе зависи финализирањето на интеграциската аспирација, како што се уставните измени и спроведувањето на реформскиот процес во согласност со принципите на Европската Унија.
Двајцата соговорници разговараа и за Коридорот 8, како проект од посебно геостратешко значење за земјата и регионот.