Србија
Здравствените работници во Србија се загрижени и укажуваат дека само за една недела во земјата официјално се пријавени 8.245 случаи на грип, покажува евиденцијата на националниот институт за јавно здравје „Д-р Милан Јовановиќ Батут“, што е сосема невообичаено за почетокот на април. Во претходните сезони, освен минатата, во која немаше ни лабораториски потврден вирус во оптек, во овој момент речиси и да не се регистрираа спорадични „опашки“ од сезоната на грип, која вообичаено завршува во март. Сега има поголемо присуство на грип отколку коронавирус и се чини дека предизвикува потешки симптоми.
За секој што бил „закачен“ од вирусот на грип во последните две-три недели, бидејќи тој се шири побрзо, претходното заболување од омикрон-сојот, сега изгледа „како мачкина кашлица“. Високата температура, која со денови не опаѓа и покрај антипиретиците, како и кревкоста на целото тело, се најчестите симптоми на кои се жалат пациентите, велат лекарите, кои во многу случаи морале да им пропишуваат антибиотици на заболените од грип поради компликации, главно бронхитис и синуситис.
Од институтот „Батут“ велат дека од почетокот на сезоната до сега, преку надзор на населението се пријавени 271.543 случаи на заболени слични на грип. Според статистиката на „Батут“, тоа е поголем број заболени во однос на претходните две сезони на грип.
– Во април ретко имавме толкав број заболени од грип, но тој брзо ќе „капитулира“ пред потоплото време, бидејќи е многу помалку отпорен од коронавирусот. Оваа сезона, она што се случи ја потврдува старата епидемиолошка теорија дека кога вирусот се шири и зафаќа простор, како што е случајот со коронавирусот, тогаш вирусот на грип нема шанси да преживее и „крена глава“ дури кога коронавирусот почна да попушта – објаснува д-р Радмило Петровиќ, епидемиолог.