Холандската крајбрежна стража информираше дека во пожар што избувнал на товарниот брод „Fremantle Highway“, што пловел под панамско знаме едно лице загинало, а неколку се повредени, пренесе Ројтерс.
Во моментот на пожарот, бродот се наоѓал во близина на северниот брег на Холандија, на околу 27 километри северно од островот Амеланд и 180 километри од Амстердам.
Бродот превезувал 2.857 автомобили од Германија до Египет, од кои 25 електрични, а се чини дека еден од електричните автомобили бил причина за пожарот.
Кога избувнал пожарот, на бродот имало 23 членови на екипажот кои неуспешно се обиделе да го изгаснат пожарот. На крајот морале да скокнат во морето за да се спасат и биле евакуирани со хеликоптери и префрлени во блиското пристаниште.
