Собранието на Македонија за в четврток ја закажа 80-тата седница на која ќе се расправа за предлог преговарачката рамка за деблокада на евроинтегративниот процес на земјава, а пред пратениците, како што е најавено, ќе се обрати и претседателката на Европската комисија (ЕК), Урсула фон дер Лајен.
Извори од Собранието претходно потврдија дека пратениците денеска преку СМС порака биле информирани оти седницата на чиј дневен ред ќе биде Информацијата за содржината на предлог-преговарачката рамка ќе се одржи во четврток во 13 часот.
Од Кабинетот на претседателот на Собранието сè уште немаат излезено со официјална информација за седницата.
Владата, според барањата од вчерашната координација во Собранието, попладнево до Собранието достави и дополнување на Информацијата за содржината на Предлог-преговарачката рамка за пристапните преговори на Македонија со Европската унија, предложена од страна на Претседателството на Франција на 30 јуни 2022 година, соопшти собраниската прес-служба.
Документите, како што посочуваат од Собрание, се доставени до сите пратеници.