Католичката црква во Франција ќе ги обесштети луѓето што биле жртви на сексуална злоупотреба на свештеници, а сумата се движи од 5.000 до 60.000 евра, пишува „Ле Паризиен“.
Независната комисија за признавање и компензација (CRR), формирана на барање на Католичката црква за да посредува меѓу жртвите и црквите во кои имало злоупотреби, разви рамка во која има одредени соодветни парични надоместоци за разни видови прекршоци и кривични дела.
За плаќање на отштетата, ќе бидат задолжени самите цркви. Според студија објавена во 50-тите, Католичката црква во Франција е одговорна за сексуална злоупотреба на речиси 216.000 деца и адолесценти.
Ако на тоа се додадат и жртвите на злоупотреба во институциите под контрола на Црквата, бројот на жртви на сексуална злоупотреба се искачува на 330.000. Но, многу малку жртви се обратиле до Црквата или до властите.
Во Германија во 2021 година Католичката црква најави исплата на отштета на жртвите на злоупотреба во износ до 50.000 евра. Досега реализираните обесштетувања во просек изнесуваат приближно 5.000 евра.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.