На синоќешното доделување на SAG Awards (Actors’ Awards), холивудските ѕвезди ја искористија можноста јавно да ја поддржат Украина.
„Чест ми е што сум овде. Ова е прекрасна вечер и сите ја славиме оваа уметност и едни со други додека толку многу се случува во светот. Моето срце е со Украина. Мислам дека вечерва сите треба да бидат благодарни“, рече Лејди Гага, која со својот потег воодушеви многумина фанови. На социјалните мрежи набрзо се прошири видеото на пејачката од доделувањето на наградите.
Пејачката и актерката подоцна се огласи на Инстаграм.
“Има многу причини зошто светот не ни дозволува да се смееме. Се молам за Украина и испраќам насмевки. Се надевам дека вашите срца наскоро повторно ќе бидат цели”, рекла Лејди Гага.
Поддршка на Украина синоќа испрати и Мајкл Даглас, кој носеше ткаено марамче во боите на Украина. Фран Дрешер се осврна и на ситуацијата во Украина.
Актерот Лесли Одом Џуниор додаде дека „Украина има посебно место во нивните срца“, а Брајан Кокс истакна дека целата ситуација ги погодила и уметниците во Русија.
„Она што навистина ме вознемирува е она што им се случува во Русија на моите колеги актери и актерки, изведувачи и критичари. Под закана за велепредавство, им беше кажано да не кажуваат ниту збор за Украина и мислам дека тоа е прилично страшно“, рече тој.