Демонстрантите незадоволни од реформата на пензискиот систем го блокираа музејот Лувр во Париз. На еден од транспарентите пишуваше „Пензионирајте се на 60 години, работете помалку за да живеете подолго“.
Група разочарани туристи се собраа пред музејот, а работниците во Лувр се меѓу демонстрантите кои се собраа пред познатиот музеј.
Водичот на музејот побара од туристите да имаат разбирање за демонстрантите.
Протестот на работниците во Лувр доаѓа пред утрешниот десетти круг штрајкови и улични маршеви низ цела Франција и уследи по насилството во градовите низ земјата поради спорната пензиска реформа.
Полицијата во одвоено соопштение наведува дека спроведува операција за спречување на неовластени собири пред уште еден познат музеј во Париз – Помпиду.
Француската премиерка Елизабет Борн минатата недела објави дека владата усвоила закон за зголемување на старосната граница за пензионирање од 62 на 64 години до 2030 година, повикувајќи се на член 49.3 од францускиот Устав, кој дозволува законот да биде усвоен без одобрение од парламентот.
Одлуката предизвика бурни реакции кај граѓаните, кои излегоа на улиците низ градовите низ државата.
