Водачите на Европската унија, министрите за надворешни работи, високи функционери и политичари ќе се соберат во Софија денеска (26-ти април) за да разговараат за чекорите за зајакнување на регионалната соработка и интеграцијата во ЕУ како дел од форумот на „ЕУ се среќава со Балканот.
Токму таму во име на Македонија патува шефот на дипломатијата Бујар Османи.
Форумот, кој на дневен ред ја става поврзаноста меѓу земјите од Западен Балкан како гарант за отпорност на новите ризици и закани, ќе се одржи во Софија Хотел Балкан, од 10:00 часот во организација на партијата АЛДЕ, со поддршка на Европскиот либерален форум и на Атлантскиот клуб во Бугарија.
Се очекува учесниците на настанот со посебни обраќања да ги поздрават Јенс Столтенберг, генерален секретар на НАТО, Роберта Мецола, претседателка на Европскиот парламент, Теодора Генчовска, министерка за надворешни работи на Бугарија и Олга Стефанишина, вицепремиер за Европа и евроатлантска интеграција.
Специјални гости на настанот ќе бидат Федерика Могерини, ректор на Колеџот на Европа и висок претставник (2014-2019) на ЕУ за надворешна политика и безбедносна политика и еврокомесарот за соседство и проширување Оливер Вархеи.
Министрите за надворешни работи на Турција, Република Македонија, Албанија, Косово и Босна и Херцеговина се очекува да разговараат за придобивките од интеграцијата на првиот панел на форумот.
Учесниците во следните дискусии ќе се фокусираат на зајакнување на регионалната соработка и интеграцијата во ЕУ, прашањето за соработката НАТО-ЕУ во контекст на војната во Украина и дезинформациите за кризата, соопштија организаторите.
