Протокот на руски гас преку гасоводот Северен тек 1 е прекинат поради планираните работи за одржување на истиот.
Протокот на руски гас за Германија преку гасоводот Северен тек на Балтичкото Море е прекинат.
Операторот на проектот Норд стрим АГ рече дека ќе биде затворен 10 дена почнувајќи од денеска поради рутинско одржување. За тоа време ќе престанат сите текови на гас низ гасоводот.
Операторот истакна дека прекинот е претходно договорен со сите партнери.
Минатиот месец рускиот енергетски гигант ги намали количините на гас испорачан во Германија преку цевката за 60% поради оперативните предизвици, предизвикани од неуспехот да се врати навреме сервисирана турбина од Канада. Сепак, германскиот министер за економија Роберт Хабек тврди дека тоа е „политичка одлука“.
Во последниве години недостигот во снабдувањето поврзан со одржувањето преку Северен тек беше компензиран со зголемени текови низ Украина или Полска.
Сепак, различни официјални лица и претставници на индустријата изјавија дека се плашат дека Русија можеби нема да го стори тоа овој пат, оставајќи го континентот да се соочи со недостиг на гас.
Норд стрим АГ, кој е во мнозинска сопственост на Газпром, инсистира дека информациите за одржување биле соодветно откриени во согласност со Регулативата на ЕУ за интегритет и транспарентност на пазарот на енергија на големо.
„Распоредот за активностите за одржување е тесно координиран со партнерите на Северен тек“, изјавија од Норд стрим АГ.