Висок дипломатски извор за „Ројтерс“ изјавил дека неодамнешните изјави од Москва за стратегијата на руските сили во Украина може да го отворат патот за смирување на ситуацијата и спасување на лицето на руските власти.
Денеска, командантот на руската армија изјави дека Русија сега ќе се фокусира на својата главна цел – ослободувањето на Донбас, имајќи предвид дека, како што рече, првата фаза од специјалната воена операција во голема мера е завршена.
Ваквите изјави се во директна спротивност со целите што ги постави рускиот претседател Владимир Путин на почетокот на инвазијата. Неговите тогашни изјави сугерираа дека целта на инвазијата е промена на режимот во Киев, односно целосна окупација на Украина.
Високиот дипломатски извор ја опишува денешната изјава од Москва како потег со кој Русија сака да си го спаси образот и да ја подготви јавноста да ја смири ситуацијата.
Изворот на дописникот на „Ројтерс“, Фил Стјуарт, му рекол:
„Првичните цели на Русија беа многу поголеми од Донбас, што резултира со тоа што неподготвените руски сили беа поделени во лошо координирани напади на повеќе фронтови“.
„Очекувавме можност Русите да ги насочат своите сили само на Донбас, но сè додека реториката на Путин останува максималистичка, мора да почекаме да видиме докази за тоа на теренот“, додал тој.