Средното стручно образование во Северна Македонија секоја година ја добива вистинската вредност кај младите, кои се почесто одбираат да се едуцираат во конкретни струки кои се барани на пазарот на трудот и овозможуваат брзо вработување и пристојна плата веднаш по формализацијата на образовниот процес, а воедно стекнатото знаење е и добра основа за понатамошна академска надградба.
Ова е заклучокот од средбата на министерот за образование и наука Јетон Шаќири со претставниците на Хелветас, невладина организација од Швајцарија која веќе 4 години е партнер на Министерството за образование и наука во заложбите за развој и промоција на средното стручно образование како дефицитарно образование во земјата.
Шаќири изрази благодарност до раководството на Хелветас што дава голема логистичка и финансиска поддршка за спроведување на проектот „Образование за вработување во Северна Македонија – Е4Е“ преку кој се спроведува дијалогот „Учи паметно, работи стручно“ помеѓу МОН, бизнис заедницата, општините и средните стручни училишта, а во насока на заедничко дефинирање на потребите од отворање на нови струки и профили кои се потребни на локално ниво, дизајнирање на наставните планови и програми и вклучување на компаниите во практичната обука на учениците од средните стручни училишта.
Дијалогот се покажа како исклучително ефективен во изминатиот период. Минатата година овозможи отворање на вкупно 97 дуални паралелки во 46 средни стручни училишта, а во соработка со над 200 компании.
Претставниците на Хелветас потврдија дека и во иднина ќе даваат поддршка преку проектот „Е4Е“, со цел синхронизација на образованието со пазарот на трудот, како основен услов за економски напредок на државата.
