Со тричасовна блокада на влезот од Скопје Сојузот на синдикати на Македонија го продолжи штрајкот повикувајќи ги надлежните да го исполнат ветеното. Бараат од 1 јули да има покачување на платите на сите вработени во јавниот сектор за 2.806 денари, колку што порасна минималецот но, и да се врати регресот за годишен одмор во јавниот сектор.
Првите синдикалци штрајкуваа на главната крстосница во населбата Автокоманда, каде во периодот од 7 до 10 часот утрово пропуштаа само возила на итната медицинска помош, противпожарната служба и полициски возила. А вработените во јавниот сектор се на своето работно место но, не извршуваат работни задачи, освен во суштинските дејности и за итни случаи.
ССМ во текот на денот ќе одлучи за следните чекори и блокади што ќе ги преземе во знак на незадоволство. Иако е во тек процесот на помирување, за сега нема најавена средба меѓу Синдикатот и Владата. Во меѓувреме, ССМ доби поддршка од некои политички партии, вклучувајќи ги ВМРО-ДПМНЕ, Социјалистичката партија на Македонија, Алијанса за Албанците и БЕСА. Тие заеднички го повикаа пратениците од владејачкото мнозинство да го гласаат поднесениот амандман на ребалансот на буџетот, со кој треба да се обезбеди покачувањето на платите во јавниот сектор.
