Трагедијата во ковид-центарот во Тетово го наметна прашањето за квалитетот и безбедноста на останатите модуларни болници. Модуларниот објект при Инфективната клиника во Скопје има капацитет од 70 легла, а директорката Милена Стевановиќ, верува дека овој објект е безбеден. Додава дека во нив биле спасени илјадници животи.
Но, според лекарот Беким Татеши, овие модуларни центри не се соодветни и не ги задоволуваат условите за лекување на пациенти во тешка здравствена состојба како резултат на Ковид-19. Како што вели, тука треба да се хоспитализираат само пациенти со лесна клиничка слика.
-Модуларните болници според мое мислење како лекар, можат да бидат помошни објекти во вакви случаи, и според мое мислење во нив треба да се лекуваат пациенти со најлесна клиничка слика. Пациентите пак, со потешка клиничка слика треба да се лекуваат со соодветни објекти. Како што видовте, една мала грешка може да биде фатална и еве што се случи… се случи она што не го очекувавме-вели Татеши.
Во нашата земја има вкупно 19 модуларни болници сместени главно во поголемите градови. Беа изградени како помошни објекти во моментот кога имаше голем наплив на пациенти заразени со коронавирус.