Украинскиот амбасадор во Германија, Андриј Мелник во интервју за БИЛД предупреди дека посетата на канцеларот Олаф Шолц на Киев и Москва денеска и вторник ќе бидат „веројатно последна шанса“ за мир.
Мелник јасно става до знаење: „Веќе имаме чувство дека војната станува сè понеизбежна“.
Тој додава дека мора да бидат подготвени за „најлошото сценарио“, и дека „главниот град би можел да биде бомбардиран во следните неколку дена“. Кога станува збор за авиони и бродови, Русија е супериорна во однос на Украина: „Ние сме навистина лесен плен за Путин“, изјави украинскиот амбасадор.
Мелник го повтори барањето на неговата влада да обезбеди одбранбено оружје од Германија. Станува збор за 12.000 противтенковски ракети кои би можеле да се употребат во копнена офанзива против 2.000 руски тенкови или 1.000 противвоздушни ракети.
Во однос на членството на Украина во НАТО, Мелник за Билд вели:
„И ние сакаме да станеме дел од семејството на НАТО. Сакаме да се приклучиме на одбранбениот сојуз – и да дадеме свој придонес“, посочува украинскиот амбасадор.
Но, според експертите, со оглед на моменталната конфликтна ситуација, не постои можност тоа да се случи во наредните неколку години, некои велат со децении, дури Украина и да ги исполни условите за влез во западната воена алијанса.