Двајца тинејџери се убиени, а осум лица се повредени во пукање за време на забава во Питсбург, на која присуствувале приближно двесте луѓе.
Очевидци велат дека се слушнале 50 истрели, а некои скокнале од прозорците за да се спасат. Полицијата трага по напаѓачите.
Пукањето се случило половина час по полноќ, а на видеото до кое дојде „Еј-би-Сс њуз“ се слушаат вресоци и се гледа паника кај учесниците на забавата, кои се обидувале да побегнат. Некои се сопнаа паѓајќи по скалите.
Некои од ранетите биле пронајдени во близина на куќата во која се одржувала забавата и со возило на брзата помош биле пренесени во болница, а други отишле со своите автомобили, соопшти полицијата.
Застрелани се десет лица, од кои двајца 17-годишни им подлегнале на повредите.
Полицијата потврди дека во престрелката учествувале неколку лица.
Ова е трето пукање за девет дена на забави во изнајмени куќи во САД. Претходните се случија во Сакраменто и Хјустон.