Портпаролот на рускиот бизнисмен и милијардер Роман Абрамович потврди дека се сомневаат оти Абрамович бил отруен за време на преговорите меѓу Украина и Русија.
Труењето, сметаат тие, се случило во Киев претходно овој месец. Со директно е потврдена сторијата објавена од „Волстрит журнал“ (WSJ) претходно денеска.
WSJ пишува дека наводно зад труењето стојат тврдокорни струи во Москва на кои крајот на војната не им оди во прилог.
Портпаролот на Абрамович не кажа ништо во таа насока, само потврди дека постои сомневање за труење.
Рускиот бизнисмен почнал да се чувствува лошо на почетокот на март додека учествувал на неформалните мировни преговори во Киев, изјавил извор за „Гардијан“.
Во преговорите учествувал и украинскиот пратеник Рустем Умеров, а мажите од Украина заминале во Полска, а потоа одлетале за Истанбул, каде што им била укажана лекарска помош.
„Тоа беше за време на неговото прво патување во Киев. Роман го загуби видот на неколку часа. Во Турција беа лекувани на клиника, заедно со Рустем“, објснил изворот на „Гардијан“.
По состанокот во главниот град на Украина, Абрамович, кој патувал меѓу Москва, Лавов и други места за преговори, како и најмалку двајца високи членови на украинскиот преговарачки тим, развиле симптоми како вцрвенети очи, постојано и болно солзење и лупење на кожата на лицето и рацете, објави WSJ.
Изјавите на изворот на „Гардијан“ се согласуваат со тврдењата за потенцијално труење кои први ги објавија американскиот весник и списанието за истражувачко новинарство Bellingcat.
„Bellingcat може да потврди дека тројца членови на делегацијата што учествувала на мировните преговори меѓу Украина и Русија ноќта меѓу 3 и 4 март 2022 година, почувствувале симптоми на труење соодветни на употреба на хемиско оружје. Една од жртвите бил и рускиот бизнисмен Роман Абрамович“, пишува Bellingcat.
Од таму додаваат дека дека ваквите симптоми вклучуваат воспаление на очите и кожата, односно продорна болка во очите.
„Тројцата мажи кои почувствувале симптоми консумирале само чоколадо и вода, неколку часови пред да се појават симптомите. Четвртиот член од тимот кој консумирал вода и чоколадо немал симптоми”, пишува Bellingcat.
„Врз основа на далечински и увиди на самото место, експертите заклучиле дека симптомите најверојатно се резултат на труење со неидентификувано хемиско оружје“, додаваат од таму.
Состојбата на Абрамович се подобрила и тој подоцна се вратил во Киев за да учествува во уште една рунда разговори, посочил изворот.