Реал Мадрид продолжи да импресионира во домашното првенство и оствари нова победа во Ла Лига, овојпат на гостувањето на Палма де Мајорка.
Домашната Мајорка успеа да одолее во првото полувреме и на моменти ги фрустираше фудбалерите на Карло Анчелоти, кои понесени по минатонеделната еуфорија со ПСЖ, повторно головите ги постигнаа во вториот дел.
Винисиус Жуниор беше жртва на еден ужасен старт и на расистички пораки од дел од гледалиштето на стадионот, па поради провокациите, реши да танцува пред несовесните навивачи во моментите кога погоди за 0:1.
Голот на Бразилецот го отвори натпреварот и Мајорка тргна по израмнување, но во таква ситуација, одново до израз дојде класата на Карим Бензема.
Французинот најпрво погоди од пенал за 0:2, а потоа со одличен гол со глава ги постави конечните 0:3 за потврда на новата победа на апсолутниот фаворит за титулата во Примера.
