Нови дојави за бомби почнаа да пристигнуваат во раните утрински часови, а цел биле неколку основни и средни училишта, како и една градинка, пишуваат српските медиуми.
Неколку училишта во Белград добиле пријави за бомби, изјавиле утринава од српското Министерство за внатрешни работи за агенцијата „Бета“, а како што неофицијално дознава „Данас“, станува збор за основното училиште „Бранко Чопиќ“ – Видиковац, основното училиште „Илија Гарашанин“ во Грочка, ОУ „Крал Петар Втори“ во Врачар, ОУ „Соња Маринковиќ“ во Земун, ОУ „Ѓуро Стругар“, ОУ „Марија Бурсаќ“, Осмата гимназија, Десеттата гимназија, Петнаесеттата гимназија, Петтото економско училиште, Тринаесеттата гимназија, математичката гимназија, машинското училиште „Радоје Дакиќ“ и основното училиште „14 Октомври“, сите во Раковица, но и градинката „Фица“ во Врачар.
Според медиумите, информации стигнале и од основното училиште „Јован Поповиќ“ во Карабурма и „Владимир Роловиќ“ на Петлово Брдо, ОУ „Стеван Синѓелиќ“ во Звездара, ОУ „Дринка Павловиќ“ и основното училиште „Драган Лукиќ“.
Од раните утрински часови на социјалните мрежи се појавила информација дека пријава за бомба добиле и многу други училишта во Белград.
Пријавите, како што пренесуваат медиумите, биле испратени по електронска пошта, а полицијата излегла на терен.
Пријава за експлозивни направи добило основното училиште „Бранко Чопиќ“ – Видиковац, а директорката на тоа училиште најавила и дека нема да има настава во утринската смена, дознава „Данас“.
Во претходниот период до многубројни училишта, како и други институции во Белград и други места во Србија, пристигнаа вакви пријави, кои, како што се покажа по полицискиот увид во објектите, биле лажни, пренесуваат медиумите во соседството.